6. oktober 2000

UKA 2000/10

 

Naalakkersuinikkut sulinermut aningaasatigut tapiissuteqartarneq pillugu

Inatsisartut inatsisaata allanngortinneqarneranik

Inatsisartut inatsisissaattut siunnersuut

pillugu

inatsisissatut siunnersuutip aappassaaneerneqarnissaanut

Inatsisartut Inatsisit Atortinneqarnerannut Ataatsimiititaliaata

ISUMALIUTISSIISSUTAA

 

Inatsisartut Inatsisit Atortinneqarnerannut Ataatsimiititaliaat suliarinninnermi ukuninnga inuttaqarpoq

Inatsisartuni ilaasortaq Anders Andreassen (Siumut), siulittaasoq
Inatsisartuni ilaasortaq Olga Poulsen (Inuit Ataqatigiit), siulittaasup tullia
Inatsisartuni ilaasortaq Lars Karl Jensen (Siumut)
Inatsisartuni ilaasortaq Anders Nilsson (Atassut)
Inatsisartuni ilaasortaq Anthon Frederiksen (Kattusseqatigiit)

Naalakkersuinikkut partiit Inatsisartuni ilaasortaatitaqartut naalakkersuinikkut sulinerminni Naalakkersuinikkut sulinermut aningaasatigut tapiissuteqartarneq pillugu Inatsisartut inatsisaat naapertorlugu tapiissuteqarfigineqarsinnaapput. Aamma taamatut periarfissaqartitaapput Inatsisartuni ilaasortat kattusseqatigiillutik qinigaasut. Aammattaaq Inatsisartuni ilaasortat kisimiillutik qinigaasut taamatut tapiissuteqarfigineqarsinnaapput.

Naalakkersuinikkulli sulinermut aningaasatigut tapiissuteqartarneq pillugu inatsit atuuttoq periarfissaqartitsinngilaq Inatsisartuni ilaasortanut, partii kattusseqatigiilluunniit tunuliaqutaralugit qinigaasunut, kingusinnerusukkulli partiit kattusseqatigiilluunniit avataanni inissisimasussanngortinneqartunut, aningaasatigut tapiissuteqarnissamut.

Siunersuut saqqummiunneqartoq ajornartorsiutip tamatuma iluarsiivigineqarnissaanik siunertaqarluni saqqummiunneqarpoq.

Inatsisit Atortinneqarnerannut Ataatsimiititaliap isumaqatigiittup siunnersuutikkut anguniarneqartoq isumaqatigaa. Kikkut tamarmik oqartussaaqataanerisa pisariaqalersippaat Inatsisartuni ilaasortat pinngitsoqaratik naalakkersuinikkut sulinermut aningaasatigut tapiiffigineqarsinnaasariaqarnerat.

Inatsisilli Atortinneqarnerannut Ataatsimiititaliaq isumaqatigiittoq isumaqarpoq Inatsisartut inatsisaata tamakkiisuunerusumik misissuataarneqarnissaanut tunngavissaqartoqarsinnaasoq. Ataatsimiititaliap paasinninnera tunngavigalugu ilaatigut pissusissamisoorpallaanngilaq qinersinermi kingullermi taasinerit pissarsiarineqartut amerlassusiisa tapiissutit angissusissaannik naatsorsuinermi atorneqartarnerat. Naatsorsueriaatsip taassuma kinguneraa partiit marluk Inatsisartuni amerlaqatigiinnik ilaasortaatitaqartut, taamaammallu allatseqartinneqarnissamik il.il. assigiimmik pisariaqartitsisut, assigiimmik angissusilimmik tapiissutisinissartik qulakkeersinnaanngimmassuk.

Inatsisilli Atortinneqarnerannut Ataatsimiititaliap eqqumaffigaa inatsimmik taamatut iluarsiinissaq isumaliorluaqqaarluni pisariaqartoq, taamaalilluni allatseqartinneqarnissamik il.il. assigiimmik pisariaqartitsineq sapinngisamik annertunerpaamik eqqortinniarneqarsinnaaqullugu. Taamaammat Inatsisit Atortinneqarnerannut Ataatsimiititaliap suleqatigiissitaliortoqarnissaa kaammattuutigissavaa, taassuma suliassarissallugu inatsisip taamatut iluarsiivigineqarnissaata piareersarneqarnissaa.

Inatsisit Atortinneqarnerannut Ataatsimiititaliap isumaqatigiittup taamatut oqaaseqarluni Inatsisartut inatsisissaattut siunnersuut saqqummiunneqartoq akuerineqaqqullugu inassutigaa.

 

	Anders Andreassen, Siumut ataatsimiititaliap siulittaasua
Olga Poulsen, Inuit Ataqatigiit		Lars Karl Jensen, Siumut
Anders Nilsson, Atassut		Anthon Frederiksen, Kattusseqatigiit